“Njeriu ashensor” bart 60 skitarë!

Me këtë veprim, kolosi që peshon 165 kg., ka thyer rekordin e vet të arritur pesë vite më parë, kur kishte bartur 20 veta më pak

Sportisti ekstrem nga Austria, Martin Hoi mund të quhet lirisht “ashensori që ec me këmbë”. Ai, në përpjekjen për të hyrë në librin e rekordeve të Ginisit ka bartur të shtunën plot 60 skitarë në një pistë të gjatë 59 metra.

38 vjeçari me këtë rast ka tërhequr plot 5004 kilogramë, kaq peshonin 60 skitarët me gjithë pajisjet e tyre. Me këtë veprim, kolosi që peshon 165 kg., ka thyer rekordin e vet të arritur pesë vite më parë, kur kishte bartur 20 veta më pak.

Pesha që Hoi ka bartur, ka rënduar më së shumti duart dhe muskulaturën e shpinës.

“Në temperatura të ulëta nuk përjashtohen lëndimet e muskujve. Ky ishte një rrezik i pa kalkuluar, pasi që pesha prej 5004 kilogramësh ishte enorme”, ka thënë austriaku.

Juria e Librit të Ginisit, në Londër pritet ta konfirmojë nëse Hoi ka arritur rekord botëror në kategorinë e vet.