Nuk lejohet kërkimi i azilit në ambasadat e Zvicrës në botë

Deputetët kanë reaguar ndaj kërkesave të bëra nga e majta në parlament (SP/PS dhe të Gjelbrit) për lejimin e sërishëm të kërkesës së azilit në ambasada, tre vjet pasi është hequr kjo e drejtë

Refugjatët as në të ardhmen nuk do të kenë të drejtë të kërkojnë azil në ambasadat e Zvicrës në botë. Kështu ka vendosur me shumicë të konsiderueshme votash Dhoma Nacionale e Parlamentit të Zvicrës në sesionin e saj të sotëm.

Me këtë votim, deputetët kanë reaguar ndaj kërkesave të bëra nga e majta në parlament (SP/PS dhe të Gjelbrit) për lejimin e sërishëm të kërkesës së azilit në ambasada, tre vjet pasi është hequr kjo e drejtë. Partitë e përmendura e kanë kërkuar këtë me arsyetimin se do të ishte në shërbim të luftimit të bandave të trafikantëve.

Duke bërë arsyetimin e tij, deputeti Glättli nga të gjelbrit ka thënë se nëse duhet luftuar kontrabandën me refugjatë, atëherë, krahas masave represive duhen mundësuar edhe format e hyrjes legale në Zvicër. Ndërsa Silbvuia Schenker nga SP/PS ka thënë se kërkimi i azilit në ambasada mund të shpëtojë jetëra njerëzish.

Por, edhe pse parimisht e kanë përkrahur si zgjidhje humane, shumica në parlament ka theksuar se një gjë e tillë mund të lejohet vetëm në rast se këtë e lejon edhe BE-ja. Nëse vepron vetëm Zvicra në këtë drejtim, atëherë ambasadat e saj në botë do të vërshoheshin nga kërkesat.