Nxënësit zviceranë, më të mirët në Evropë për matematikë

Ndërsa në konkurrence të vendeve të OECD-së, nxënësve të Zvicrës në lëndën e matematikës ua kalojnë vetëm ata nga Koreja e Jugut dhe nga Japonia

Në testin më të ri të Pisa-s, në të cilin testohen njohuritë shkollore nga lëndë të ndryshme, nxënësit zviceranë kanë arritur rezultate kulminante, sidomos në matematike. Ata janë zgjedhur më të mirët në nivel të shteteve të Evropës, sa u përket njohurive nga matematika. Vetëm moshatarët e tyre të Principatës së Lihtenshtajnit, (që në shumë fusha funksionon si një vazhdimësi e shtetit zviceran) janë për një nuancë më të mirë. Ndërsa në nivel botëror vendet e para janë rezervuar për nxënësit e Singaporit, Koresë dhe Japonisë.

Nxënësit zviceranë kanë bërë përparime edhe në disiplinën e leximit, krahasuar me testin e fundit, të realizuar para tri vitesh. Me mesataren prej 509 pikësh, Zvicra, ashtu sikurse edhe para tri vitesh, hyn në mesin e 12 shteteve në të suksesshme të OECD-së.

Studimi i Pisa-s është realizuar në vitin 2012 por rezultatet e tij janë publikuar të martën, më 3 dhjetor. Është arritur një përmirësim i lehtë në krahasim me tri vite më parë në disiplinën e leximit. Ai, sipas kryetarit të konferencës së drejtorëve të arsimit të Zvicrës, Christoph Eymann shpjegohet me ardhjen në rritje të migrantëve me kualifikime të larta në Zvicër viteve të fundit.

Në studimin e parë të Pisa-s të bërë në vitin 2000, nxënësit zviceranë qenë ndarë relativisht keq sa i përket kompetencës së tyre për lexim. Ky rezultat kishte shtyrë autoritetet e arsimit që të ndërmarrin një varg masash dhe programesh stimuluese për përmirësimin e gjendjes. Dhe këto programe, bashkë me ndryshimin e strukturës së gjeneratës së parë të migrantëve kanë ndikuar që rezultatet në lexim të përmirësoheshin.

Ndërsa, sa i përket matematikës, nxënësit zviceranë të moshës 15 vjeçare, në testin më të ri kanë dalë shumë më të mirë se mesatarja e vendeve të OECD-së, shkruan rsf.ch. Nëse kjo mesatare është 494 pikë, mesatarja e nxënësve të Zvicrës është 531 pikë. Ndonëse në krahasim me testin e para ri viteve, kur kishin tubuar 534 pikë, është shënuar një rënie simbolike, nxënësve të Zvicrës në lëndën e matematikës ua kalojnë vetëm ata nga Koreja e Jugut dhe nga Japonia.
Në shkencat natyrore, nxënësit nga Zvicra, me 515 pikë, po ashtu kanë shënuar një rënie të vogël në krahasim me vitin 2009, por edhe me këtë rezultat ata hyjnë në mesin e 12 më të mirëve nga 34 shtetet anëtare të OECD-së.