OEK: Vjedhjet e bizneseve, rrezik për investime në Kosovë

Afaristët kërkuan nga MPB që të merren masa për mbrojtjen e bizneseve nga hajnat, sepse kjo dukuri, sipas tyre, është në rritje dhe dëmi që po pësojnë bizneset po janë të mëdha

Përfaqësuesit e Odës së Afarizmit të Kosovë u kanë rekomanduar institucioneve vendore në Prishtinë, që të ndalin vjedhjen ndaj bizneseve e cila përveç që është bërë dukuri, po krijon rrezik për investime të reja. Këto deklarata përfaqësuesit e OAK-së ia adresuan sot ministrit të Punëve të brendshme të Kosovës, Flamur Sefajt.

Ky i fundit ka pritur sot në takim përfaqësuesit e Odës së Afarizmit të Kosovës të kryesuar nga kryetari i Bordit të OAK-së, Skender Krasniqi, drejtorin ekzekutiv, Ismet Mulaj.

Krasniqi e informoi ministrin Sefaj, për shqetësimet e afaristëve në lidhje me vjedhjet e shumta që po ndodhin kohëve të fundit nga persona të pandërgjegjshëm. Krasniqi, kërkoi nga ministri që të merren parasysh shqetësimet e afaristëve, sepse kjo dukuri është në rritje dhe dëmi që po pësojnë bizneset po janë të mëdha.

Kurse Lulëzim Begaj, anëtar i bordit i Odës, njëherit pronar i Kosmonte Foods, e njoftoi ministrin Sefaj me raste konkrete të plaçkitjeve në pronën e tij, por edhe të bizneseve tjera. Gjithashtu foli edhe për pasigurinë që po e kanë pas vjedhjeve të mëdha që po u bëhen atyre.

Begaj, u shpreh shumë i indinjuar nga mos efikasiteti i organeve të drejtësisë për zbulimin e rasteve.

Edhe përfaqësuesi i Elkos Group, Arsim Selmonmusaj, tregoi për nevojën imediate të përmirësohet gjendja e sigurisë e me theks të veçantë për sektorin privat.

Ministri Sefaj, ndërkaq iu premtoi atyre që do mundohet t’i adresoi të gjitha kërkesat e tyre, pasi është mjaft i interesuar që të ofrojë një ambient sa më të sigurt për të bërë biznes, duke qenë se afaristët janë ata që krijojnë mirëqenien dhe zhvillimin ekonomik. Në takim u diskutua edhe për mundësit e pajisjes së sigurimit me armë, në mënyrë që të kenë mundësi të mbrojnë pronën ku ata sigurojnë.