Paga mesatare vjetore në Zvicër, 58.800 franga

Gjatë viteve të fundit në Zvicër është zvogëluar dallimi në mes të pagave të ulëta dhe atyre të larta, thuhet në një studim të Bakbasel

Këtë e tregon një studim i realizuar nga ndërmarrje hulumtuese BAK Basel, e cila ka bërë krahasimin e pagave të vitit 2007 me ato të vitit 2012. Nga ky krahasim del se pagat më të larta gjatë kësaj periudhe janë rritur më pak ndërsa ato më të ulëtat kanë pasur ngritje, shkruan finanzen.ch. Kjo tregon rënie të varfërisë ndërkohë që numri i atyre që marrin ndihma sociale ka mbetur i njëjtë.

Në shifra absolute, paga mesatare vjetore e zviceranëve në vitin 2012 ka qenë 58.800 franga, transmeton albinfo.ch. Të ardhurat mesatare (Median: gjysma e popullatës nën to dhe gjysma tjetër mbi to) në atë vit kanë qenë 49.981 franga. Nga viti 2007 deri në vitin 2012 pagat mesatare janë rritur për 6700 franga ndërsa ato “median” për 6600 franga. Dihet se kriza e madhe financiare botërore pati bërë që në vitet 2009 dhe 2010 pagat të stagnonin.

Sipas përfaqësuesit të Bakbasel, Martin Eischkler, zvogëlimi i numrit të atyre që kanë paga më të vogla lidhet me aktivizmin e sindikatave dhe të majtës. “Për shembull iniciativat e sindikatave, si ajo “e 3000 frangave” ose iniciativa për pagën minimale prej 4000 frangave – të cilën ndërkohë e paguajnë shumë punëdhënës vullnetarisht – kanë bërë që pagat në skajin e poshtëm të kenë një rritje pak më të madhe”.