Papunësia mbetet e lartë në eurozonë

Shkalla e papunësisë në shtetet e eurozonës mbetet e lartë, por nuk ka ndryshuar kohët e fundit

Në 17 vendet e Eurozonës në shtator niveli i papunësisë mbetet i pandryshuar, në 12.2 për qind. Këto të dhëna i ka bërë publike Agjencia Evropiane e Statistikave Eurostat. Gjithsej në vendet e Eurozonës ishin 19. 447 milionë burra dhe gra pa punë. Në të gjitha 28 shtetet anëtare të BE-së janë regjistruar 26.872 milionë të papunë, ose 11 për qind.

Greqia është duke luftuar me një normë papunësie prej 27.6 për qind. Në Spanjë janë 26.6 për qind të njerëzve që kanë mbetur pa punë në shtator. Qipro dhe Kroacia kanë raportuar norma të më shumë se 17 për qind të të papunëve.

Më e relaksuar është gjendja në Austri (4.9 për qind), Gjermani (5.2 për qind) dhe Luksemburg (5.9 për qind). Këto vende kanë papunësinë më të ulët në BE.

Gjatë dymbëdhjetë muajve të fundit situata është përkeqësuar në tregun evropian të punës.

Sidomos të rinjtë kanë vështirësi për të gjetur punë.

Në shtator 2013 rreth 5.6 milionë njerëz ishin të papunë nën moshën 25- vjeçare, që është 23.5 për qind e njerëzve të rinj në 28 vendet e BE-së.

Në vendet që përdorin valutën euro ishin rreth 3.5 milionë, ose 24.1 për qind e të rinjve pa punë.

Komisari i BE-së, Laszlo Andor, ka paralajmëruar se papunësia e lartë vazhdimisht do kërcënojë forcimin ekonomik të BE-së.

“Nuk mund të ketë Evropa rritjen ekonomike, ndërsa 26.8 milionë njerëz nuk mund të gjejnë punë”, tha ai.

Ai u bëri thirrje shteteve anëtare të BE-së për t’i reduktuar taksat dhe kontributet e sigurimeve shoqërore për punëtorët me paga të ulëta.