Pasojat e stuhisë ‘Ciaran’ në Shqipëri

Si paraqitet sot situata në Tiranë, Durrës, Elbasan dhe Korçë?

Duket se stuhia ‘Ciaran’ që goditi të premten Shqipërinë ka lënë pasoja në shumë rajone të vendit, kryesisht me bllokimin e rrugëve dhe probleme me energjinë elektrike, përcjell albinfo.ch.

Reshjet e dendura të shiut vijuan edhe gjatë natës, por situata sot paraqitet më e lehtë se dita e djeshme, e cila përmbyti rrugët duke shkaktuar aksidente, trafik dhe kaos.

 

TIRANË

Kryeqyteti sot është lehtësuar. Niveli i Lumit Lana që doli dje nga shtrati ka rënë, ndërsa janë pastruar edhe rrugët nga rrëzimi i pemëve. Rrugët janë të kalueshme dhe sot nuk raportohen telashe në trafik.

 

DURRËS

Situata është e qetë. Gjatë natës në territorin e qarkut Durrës ka pasur prani të reshjeve me intensitet të ulët deri mesatar, me karakter sporadik, ku herë pas herë ka pasur prani të erës.

 

Niveli i prurjeve në të dy lumenjtë Ishëm dhe Erzen (problematikë nga përvoja e viteve të kaluara), janë rritur, por nuk paraqet rrezik për dalje nga shtrati.

Hidrovorët e Porto-Romanos dhe Hamallajt vijojnë punën me kapacitet të plot.

Akset rrugore janë të kalueshme pa probleme. Furnizimi me ujë dhe energji elektrike vijon normalisht me përjashtim të disa defekteve për shkak të dëmtimit të rrjetit elektrik nga prania e erës gjatë natës.

Në lagjen Baromet, Shijak, për shkak të bllokimit të disa pusetave ka dalë uji në rrugë. Është duke u punuar me pompë thithëse nga ana e forcave zjarrfikëse.

 

ELBASAN

Gjatë natës në Elbasan ka pasur reshje shiu me intensitet mesatar, të cilat deri në mëngjesin e sotëm kanë arritur në 50 mm.

 

 

 

 

---