Frutat e perimet nga Shqipëria më të kërkuarat në rajon

Ministri i Bujqësisë dhe Zhvillimit Rural i Shqipërisë, Niko Peleshi, ka vizituar disa ferma dhe pika grumbullimi në zonën e Lushnjës dhe të Divjakës.

Ai është ndalur veçanërisht në një kompani, e cila është lider përsa i përket eksportit të produkteve bujqësore, me një eksperiencë 12 vjeçare në tregun shqiptar.

“Prodhimet bujqësore shqiptare sot gjenden në vendet e Bashkimit Europian, në Suedi, në Çeki, në Itali, në Rumani, Bullgari, Greqi, Zvicër dhe shumë vende të tjera”, tha ai.

Tutje ministri Peleshi është shprehur se ky vit është një nga më të mira të bujqësisë shqiptare përsa i përket prodhimit të fruta–perimeve dhe veçanërisht të eksportit tyre.

“Këto produkte tërhiqen dhe kërkohen për vetë faktin, pasi janë prodhime të garantuara, të një cilësie të lartë dhe ajo që është më e rëndësishme të pastra biologjikisht”, theksoi ministri.