Për 1000 fëmijë emigrantë përkujdeset një grua amerikane

240 mijë emigrantë janë dëbuar nga SHBA-ja pa dokumente dhe pa histori kriminale, 20 mijë më shumë se në vitin 2012.

Sipas studimeve të qendrës “Pew”, shumë nga të dëbuarit lanë pas fëmijë që janë qytetarë amerikanë. Një grua nga Florida po kujdeset për qindra prej tyre. Më shumë se 900 të tjerë janë nën kujdesin e Nora Sandigos, raporton VoA.

Ajo u sjell atyre çdo ditë mjete shkollore dhe ushqime që i janë dhuruar organizatës së saj dhe çdo javë ajo i mbledh ata në shtëpinë e saj në Florida. Sandigo ruan dokumentet e secilit prej fëmijëve: pasaporta, certifikata lindjeje dhe transferime të noterizuara të kujdestarisë, dokumentet për afro një mijë fëmijë, prindërit e të cilëve kanë hequr dorë nga të drejtat e tyre.

Fëmijët kanë lindur në Shtetet e Bashkuara, domethënë janë qytetarë amerikanë. Por, ose njëri ose dy prindërit e tyre pa dokumente janë deportuar.

Nëse fëmijët qëndrojnë në Shtetet e Bashkuara, ata mund të marrin ndihmë ekonomike nga qeveria. Por, Sandigo thotë se të afërmit ose fqinjët që marrin përsipër t’i mbajnë fëmijët druhen të kërkojnë ndihmë nga agjencitë qeveritare.

Sandigo është aq e indinjuar saqë mori një autobus me qira, e mbushi me 38 nga fëmijët dhe shkoi nga Miami në Shtëpinë e Bardhë, ku i kërkoi ndihmë Presidentit Obama.