Për zviceranët, kënaqësia në punë më me rëndësi se paga

Zviceranët, në radhë të parë e vënë kënaqësinë me vendin e punës, për çka janë shprehur 56% të të anketuarve. Për lartësinë e pagës janë përcaktuar vetëm 6%!

Për zviceranët, kënaqësia me vendin e punës dhe klima në ndërmarrje kanë më shumë rëndësi se lartësia e pagesës. Këtë përfundim e nxjerr një studim i realizuar nga “Reader`s Degest”.

Në radhë të parë e vënë kënaqësinë me vendin e punës 56% të të anketuarve. Te zviceranët perëndimorë (frankofonë) kjo përqindje madje është edhe më e lartë, 68%. Klima në ndërmarrje zë vendin e dytë për nga rëndësia, ose 26%  për personat e anketuar, që merret se e përfaqësojnë edhe mesataren zvicerane. Zviceranët gjermanofonë dhe gjinia femërore në këtë pikë mbërrijnë në kuotën 29%.

Shpërblimi material, ose rroga, është në vendin e tretë por me një përqindje dukshëm më të ulët se dy të parat. Vetëm 6 për qind të zviceranëve të punësuar i japin më shumë rëndësi pagës së lartë në krahasim me faktorët e përmendur më parë. As te të rinjtë nga mosha 15 deri në atë 34 vjeçare  kjo radhitje nuk ndryshon. Vetëm për 7 për qind të tyre paga është në rend të parë e pastaj të tjerat, shkruajnë mediet zvicerane.

Për 6 për qind të të anketuarve më e rëndësishmja është mundësia që puna jep për zhvillimin personal. Te të rinjtë kjo pikë arrin në 9%.

Identifikimi me ndërmarrjet ku punojnë “vlen” 5% ndërsa prestigji i profesionit vetëm 2 %  për zviceranët e anketuar.