Përgjigjet Sommaruga: Nuk e ndryshojmë politikën ndaj eritreanëve

Nuk qëndron ajo që thuhet në letrën e Qeverisë së Kantonit të Lucernit se "secili azilkërkues nga Eritrea fiton statusin e refugjatit

„Se çfarë mbrojtje u ofrohet refugjatëve nga Eritrea, kjo nuk është çështje e politikës por e drejtësisë”. Kjo është përgjigja e  Ministrisë për Drejtësi dhe çështje policore (EJPD) për letrën e dërguar nga qeveria e kantonit të Lucernit,  e cila kërkon që refugjatëve nga Eritrea të mos u njihet statusi i refugjatëve.

Me këtë përgjigje, ministria në fjalë ka bërë me dije se e hedh poshtë kërkesën që përmban letra në fjalë. Me fjalë tjera, kjo ministri nuk e ka ndërmend të ndryshojë praktikën e saj në qasje me azilkërkuesit nga Eritrea.

Për më tepër, saktëson ministria në përgjigjen e saj, nuk qëndron ajo që thuhet në letrën e Qeverisë së Kantonit të Lucernit se “secili azilkërkues nga Eritrea fiton statusin e refugjatit. “Rreth gjysmës së  azilkërkueseve eritreanë që kanë gjetur strehim në Zvicër nuk u është njohur edhe statusi i refugjatit por vetëm një status i përkohshëm (F) ka thënë ministrja Sommaruga duke hedhur poshtë dhe demantuar kërkesën e bërë nga kantoni i Lucernit.

Në mediet e të mërkurës është publikuar përmbajtja e një lere që në emrin e qeverisë së Kantonit të Lucernit ia ka dërguar ministres së drejtësisë Sonetta Sommaruga ministri kantonal Guido Graf. Në atë letër kërkohet që azilkërkuesve nga Eritrea të mos u njihet azili në Zvicër pasi që ata janë refugjatë ekonomikë dhe njerëz që kanë refuzuar të kryejnë shërbimin ushtarak në vendin e tyre. Asnjërës nga këto kategori nuk i takon azili, thuhet veç terash në letër.

Letrën nga Lucerni e ka kritikuar edhe organizata që mbron të drejtat e e refugjatëve Flüchtlingshilfe (SFH). Një zëdhënës i SFH ka thënë se nuk është detyrë e qeverisë së Lucernit që të bëjë kategorizimin e azilkërkuesve sipas  vendit të prejardhjes sepse për këtë gjë ekzistojnë specialistët. Kjo që po bëhet është më tepër pjesë e luftës zgjedhore që ministri për punë sociale në kantonin e Lucernit, Guido Graf dëshiron ta bëjë në favor të partisë së tij.