Përkrahet nisma për ashpërsim qasjeje ndaj recidivistëve

Nathalie Rickli: Kryesit e veprave të rënda penale të kenë në maksimum shansin e dytë për përmirësim por assesi edhe shansin e tretë, të katërt etj.

Personat e dënuar për vepra të rënda të dhunës si vrasje të rëndë, vrasje me paramendim apo përdhunim seksual do të duhej të dorëzoheshin në institucionin e kujdestarisë (izolimit) në mënyrë automatike kur këto vepra penale i kryejnë sërish. Për të ndodhur kjo nuk duhet të përmbushen kushte plotësuese. Ky është qëndrimi i Komisionit për Drejtësi të Dhomës Nacionale, i cili ka miratuar me shumicë votash një iniciativë parlamentare të bërë lidhur me këtë çështje.

Autorja e iniciativës, deputetja e SVP/UDC-së, Nathalie Rickli synon që me këtë iniciativë të arrihet që kryesit e veprave të tilla penale të kenë në maksimum shansin e dytë për përmirësim por assesi edhe shansin e tretë, të katërt etj.

Komisioni  po ashtu ka miratuar një propozim tjetër të deputetes Rickli me të cilin do të vështirësohet lirimi me kusht nga masa e izolimit e personave të dënuar për vepra të rënda penale. Me këtë parashihet që lirimi të bëhet vetëm kur është “praktikisht e sigurt” se personi në fjalë nuk do të përsërisë kryerjen e veprave penale. Me rregullimin aktual, për të liruar atë që mbahet në masë izolimi mjafton vetëm konstatimi se “është e pritshme” se ai nuk do të kryejë delikte por që kjo nuk përjashtohet.