Peticioni zviceran kundër avionëve luftarakë amerikanë F-35 mbledh 42,000 nënshkrime

Një peticion i “Aleancës Stop-F35” që i kërkon qeverisë zvicerane të ndalojë menjëherë blerjen e avionëve të rinj luftarakë amerikanë ka mbledhur 42,500 nënshkrime. Aktivistët duan që parlamenti, i cili do të votojë për kërkesa të ngjashme, të ndërmarrë një hap të parë në këtë drejtim.

“Nuk është tepër vonë për të marrë vendimin e duhur,” shkroi aleanca, e cila përfshin Partinë Social Demokrate të krahut të majtë dhe Partinë e Gjelbër, dhe grupe të tilla si Campax dhe Grupi për një Zvicër pa ushtri (GSoA).

Ata denoncojnë “varësinë nga Shtetet e Bashkuara që kemi kontraktuar me blerjen e këtij avioni; është dhe mbetet e pahijshme”.

Pas zgjedhjes së Presidentit të SHBA-së, Donald Trump, është bërë edhe më e qartë se sa shkatërruese është një varësi ndaj SHBA-së për politikën e sigurisë, sipas Aleancës Stop-F35, e cila pretendon se përfaqëson shumicën e popullsisë, transmeton albinfo.ch.

Në një sondazh përfaqësues të publikuar nga Tages Anzeiger në prill, mbi 80% e të pyeturve thanë se kundërshtonin blerjen e avionëve luftarakë F-35 nga Zvicra, theksoi aleanca, shkruan RTS.

Në vitin 2022, Berna nënshkroi një kontratë me prodhuesin amerikan Lockheed Martin për blerjen e 36 avionëve luftarakë F-35 A, me vlerë pak më shumë se 6 miliardë CHF. Avionët do të dorëzohen nga viti 2027 deri në vitin 2030, duke zëvendësuar flotën e vjetër të avionëve luftarakë të Zvicrës të F/A-18 Hornets dhe F-5 Tigers.