Propozohet shtimi i numrit të ministrave, nga 7 në 9

Kantoni i Tesinës e sheh veten të pa shanse që në konstelacionin e sotëm prej 7 ministrash të ketë vend për një përfaqësues të tij

Një propozim i bërë nga fundi i vitit të kaluar që të rritet numri i ministrave në Këshillin Federal, qe hedhur poshtë nga parlamenti. Por tash, Komisioni për Politika të shtetit, i Dhomës Nacionale të Parlamentit e ka vënë në pyetje këtë vendim nga viti i kaluar. Komisioni në fjalë ka iniciuar një iniciativë të re që qeveria të ketë 9 ministra në vend të 7 sa ka tash. Në arsyetimin e bërë, ky komision shkruan se me këtë numër ministrash ndjehet i anashkaluar sidomos klantoni i Tesinës.

Komuniteti italishtfolës i Zvicrës, i përqendruar në kantonin jugor të Tesinës e sheh veten të pa shanse që në konstelacionin e sotëm prej 7 ministrash të ketë një vend për një përfaqësues të tij. Nisur nga kjo, nga ky kanton prej kohësh kanë filluar të vijnë kërkesa për shtimin e numrit të ministrave në Qeverinë Federale.

Veçanërisht ishte aktualizuar kjo kërkesë vitin e kaluar, pas tërheqjes së Micheline Calmy Rey nga posti i saj i ministres, shkruan azonline.ch.

Atëbotë kandidatja nga Tesina, Marina Carobbio nuk pati mundur të depërtonte në shtatëshen e madhe të Bernës.

Nëse edhe komisioni i Dhomës së Kantoneve voton po ashtu për shtimin e numrit të ministrave, atëherë komisioni që ka lancuar iniciativën mund të bëjë draftin e projektit për ndryshimin e kushtetutës.

Debati për shtimin e numrit të ministrave në Qeverinë e Zvicrës po vazhdon prej rreth 10 vitesh.