Pse mërgimtarët nga Zvicra frekuentojnë me shumë aeroportin e Prishtinës

Çdo vit, gati 1 milion pasagjerë nga Zvicra udhëtojnë drejt Kosovës përmes aeroportit

Në pesë vjetët e fundit mërgimtarët nga Zvicra përbëjnë numrin më të madh të ardhjeve në Kosovë, në krahasim me shtetet e tjera të botës, me theks të veçantë, të Evropës, shkruan albinfo.ch.

Si në vitin 2019, ashtu edhe në vitet 2020 dhe 2021, 2022 dhe pritet edhe në vitin 2023, mërgimtarët nga Zvicra janë në krye të listës për nga numri më i madh i ardhjeve në Kosovë përmes Aeroportit Ndërkombëtar të Prishtinës “Adem Jashari”.

Duket se numri i mërgimtarëve që jetojnë në Zvicër është i madh dhe, për këtë arsye, shumica e tyre janë të prirur të udhëtojnë përmes aeroportit të Prishtinës, veçmas në vitet e fundit.

Po ashtu, shumë mërgimtarë nga Gjermania udhëtojnë kryesisht edhe përmes aeroportit të Bazelit, për shkak të afërsisë nga vendi që jetojnë.

Gjithashtu edhe shumë mërgimtarë nga Franca, që jetojnë në afërsi të pjesës franko-zvicerane, udhëtojnë kryesisht përmes aeroportit të Gjenevës.

Kështu, bashkë me mërgimtarët nga Zvicra e përbëjnë numrin më të madh të destinacionit Zvicër-Kosovë.

Numri më i madh i udhëtarëve që fluturojnë për në aeroportin e Prishtinës janë nga qytetet: Bazeli, Cyrihu dhe Gjeneva.

Referuar të dhënave nga Aeroporti Ndërkombëtar i Prishtinës “Adem Jashari” dhe Byroja Kosovare e Sigurimeve, në periudhën janar-dhjetor të vitit 2022 kishte 2,964,845 pasagjerë.

Referuar të dhënave nga Zyra për Informim nga ANP-ja, brenda kësaj periudhe prijnë udhëtarët nga Zvicra, pastaj Gjermania, Turqia (mërgimtarët nga Amerika), Austria, Franca, Mbretëria e Bashkuar, Norvegjia, Belgjika dhe Finlanda./Albinfo.ch

---