Qeveria formon grup ekspertësh për jetësimin e iniciativës

Ministrja e drejtësisë, Sommaruga dhe ai i ekonomisë, Schneider-Amman kanë caktuar për 13 mars një takim për këtë qëllim

Këshilli Federal i Zvicrës ka vendosur të emërojë një grup ekspertësh për jetësimin e iniciativës kundër migracionit masiv, që është votuar më 9 shkurt. Me këtë rast qeveria e vendit heq dorë nga ngritja e një grupi pune, siç praktikohet zakonisht në raste të ngjashme. Grupi i ekspertëve do të punojë nën drejtimin e Entit Federal për Migracion (BFM) për të gjetur dhe përpunuar zgjidhjet e nevojshme.

Në grup nuk është paraparë pjesëmarrja e përfaqësuesve të bartësve të iniciativës së përmendur.

Ministrja e drejtësisë Simonetta Sommaruga dhe ministri i ekonomisë, Johann Schneider-Amman kanë caktuar për 13 mars një takim me përfaqësues kryesorë të bashkësive dhe federatave ekonomike, sindikale, si dhe të bashkësisë së qyteteve dhe asaj të kantoneve.

Në takim do të bëhet shkëmbimi i ndërsjellë i informacioneve lidhur me gjendjen aktuale në terren, bën të ditur departamenti për çështje të drejtësisë dhe të policisë në një komunikatë të publikuar të premten.

Grupi i ekspertëve do të rekrutohet nga  ky rreth dhe sigurisht edhe nga njerëz të profesionit. (albinfo.ch&sda)