Qeveria, kundër iniciativës “Për një fond shëndetësor publik”

Sipas iniciativës së SP/PS, sigurimi bazë shëndetësor do të ofrohej nga një fond i vetëm publik shëndetësor. Referendumi mbahet më 28 shtator

Ministri federal Alain Berset, në resorin e të cilit gjendet edhe shëndetësia, ka shpalosur sot argumentet kundër iniciativës popullore “Për një fond shëndetësor publik” që vjen nga partia e tij, SP/PS.

Sipas Berset, sistemi i sotëm ku veprojnë mbi gjashtëdhjetë arka shëndetësore private është dëshmuar si i suksesshëm. Ndërsa në rast se do të kalohej në sistem të sigurimit shëndetësor të vetëm e publik, personat e siguruar nuk do të ishin të lirë të zgjedhin arkën e shëndetësisë sipas preferencave të tyre, njofton sda. Veç kësaj, një ndërrim i tillë do të sillte me vete edhe një kosto vështirë të llogaritshme.

Sipas iniciativës së lansuar nga SP/PS, sigurimi bazë shëndetësor në të ardhmen do të ofrohej nga një fond i vetëm publik shëndetësor. Referendumi për këtë iniciativë mbahet më 28 shtator të këtij viti.

Në argumentimin e ministrit kundër iniciativës thuhet se qeveria dhe parlamenti, kanë nisur reformat përkatëse për të eliminuar dobësitë ekzistuese të sistemit aktual.

Përveç qeverisë dhe parlamentit, kundër iniciativës është shprehur edhe federata e spitaleve H+. Një anketë e bërë gjatë majit me pjesëtarët e kësaj federate ka konstatuar se 80 për qind e tyre e hedhin poshtë iniciativën.