Rama: 60 kompani ndërtimi po hetohen në Durrës

Janë identifikuar 60 kompani, të cilat janë duke u hetuar për punën e paligjshme të ndërtimit!

Së fundi kryeministri Edi Rama ka mbledhur kabinetin qeveritar, pasi vendi po përballet me dëmet e shkaktuara nga tërmeti i fuqishëm që mori pas 51 jetë njerëzish dhe la mbi 700 të plagosur.

Po ashtu, Rama tha se në Tiranë dhe Durrës është gati të fillojë procesi i meremetimeve, ku në Durrës janë 12 kompani të gatshme dhe presin lejen e autoriteteve.

Sipas tij, tashmë janë identifikuar 60 kompani, të cilat janë duke u hetuar.

“60 firma në Durrës janë të regjistruara nga policia dhe hetimi përkatës si kompani që lidhen me godina të ndërtuara, 12 janë gati, një apel të tjera që të vijnë, nëse duan të lajnë një pjesë të shpirtit të tyre në këtë proces. Hetimi vijon. Janë 30 persona në grupin e hetimit të policisë kriminale bashkë me prokurorët që po mbledhin dokumentet. Nuk ka asnjë provë që fshihet, të gjitha vendngjarjet janë të mbyllura nga pikëpamja e dokumenteve, provave, fotografimit etj.”, tha Rama.

Gjithashtu për kryeministrin programi i rindërtimit kërkon një fuqi të madhe punëtore dhe se ky është një problem që kërkohet të zgjidhet duke angazhuar persona edhe nga jashtë.

“Kemi një problem me fuqinë punëtore, të marrim edhe nga jashtë. Duhen mijëra njerëz që do të përfshihen në punë. Në seancën e datës 19 ta kalojmë në Parlament, që e kemi bërë gati që në tetor për aksesin e fuqisë punëtore nga jashtë”, tha Rama.

Ai tha se pasi të mbyllet procesi i pastrimit, do të nisë puna për ndërtimin e lagjeve të reja të banimit për banorët e prekur, ndërsa vuri theksin tek një problem që lidhet me mungesën e fuqisë punëtore.

---