Rama: Do të vaksinohem i pari, për të dhënë shembullin se vaksina është e sigurt

Në daljen publike kryeministri i Shqipërisë tha se po futet pa radhë për të dhënë shembull se vaksina është e sigurt.

Ai do të vaksinohet sot i pari. Rama konfirmoi se do të vaksinohet njësoj si shumë kryeministra të tjerë në botë për të dhënë mesazhin se vaksina është e sigurt. Kryeministri gjithashtu dha edhe orën kur do të nisë vaksinimi. Në 15:00, në Air Albania, do të bëhet vaksinimi i qytetarëve të parë me Pfizer/BioNtech.

“Vaksinën do e bëj edhe unë për të dhënë një shembull, pasi vaksina është arma për këtë virus të padukshëm. Dhe për t’iu thënë të gjithëve që dokrrat me çipe dhe transformime të ilirëve në vikingë nuk janë të vërteta. Unë do e bëj për shembull, njësoj si shumë kolegë të mi, ndërsa anëtarët e kabinetit do të marrin kohën. S’mund të marrin vaksinën para të tjerëve, para nënës së vet, për shembull. Edhe unë s’duhet ta bëja, meqënëse ka një pjesë teori konspirative. S’do të doja ti zija radhës askujt. Do e bëj sot patjetër vetëm për këtë arsye! Vaksinimi nis sot në 15:00 në Air Albania”, tha Rama.