Reagon komuniteti mysliman pas ndalimit të mbulimit të plotë të fytyrës

Sulm kundër vlerave tona në Zvicër

Tashmë thuajse edhe Zvicra është shtuar në listën e vendeve që ka ndaluar mbulimin e plotë të fytyrës, transmeton albinfo.ch.

Qytetarët zviceranë kanë votuar për ndalimin e mbulimit të fytyrës në referendumin e mbajtur gjatë ditës së djeshme, ku rezultati pro ishte 51 për qind, e kundër 49 për qind.

Pas qeverisë zvirerane, ka reaguar edhe komuniteti mysliman i këtij vendi, i cili përbën 5 për qind të popullatës, raporton The Guardian.

“Ky është një sulm kundër komunitetit mysliman në Zvicër. Ajo që synohet këtu është që të stigmatizohen dhe të margjinalizohen myslimanët edhe më shumë”, tha Ines Al Shikh, një anëtar i Les Foulards Violets, një kolektiv feminist mysliman.

“Kjo politikë simbolike drejtohet kundër muslimanëve femra dhe meshkuj”, tha Federata Zvicerane e Organizatave ombrellë Islamike në një deklaratë. “Por gjithashtu dëmton tërë Zvicrën, e cila ka minuar vlerat e veta, duke pranuar iniciativën”, shkruan më tutje.

Ndryshe, qeveria zvicerane ka reaguar duke deklaruar se kjo nuk është kundër myslimanëve.

---