Rreziku nga rrëshqitjet e dheut mbetet i lartë në Brienz

(KEYSTONE/Michael Buholzer)

Një seri rrëzimesh të vogla shkëmbinjsh ka ndodhur midis 9 dhe 12 korrikut mbi fshatin Brienz/Brinzauls në kantonin Graubünden të Zvicrës lindore, duke rritur shqetësimet për një përshkallëzim të rrezikut nga rrëshqitjet e dheut në këtë zonë të cenueshme, shkruan swissinfo, transmeton albinfo.ch.

Sipas komunës së Albulas, disa mijëra metra kub mbetje ranë nga pllaja lindore dhe “fronti” mbi fshat në zonën e quajtur “Schutthalde oben”, duke e përshpejtuar ndjeshëm rrëshqitjen e dheut. Ndonëse shpejtësia e lëvizjes është ulur disi pas reshjeve të forta në fillim të korrikut, autoritetet paralajmërojnë se situata mund të përkeqësohet shpejt në rast të reshjeve të reja.

“Situata e përgjithshme mbetet e tensionuar. Rreziku është ende i lartë dhe zona e rrezikut mund të përshkallëzohet me shumë shpejtësi,” thuhet në buletinin informativ të komunës së Albulas.

Për këtë arsye, niveli i rrezikut vazhdon të jetë në nivelin e kuq dhe ndalesa për hyrje në fshatin Brienz/Brinzauls dhe zonat përreth mbetet në fuqi. Megjithatë, autoritetet kanë njoftuar për shpërfillje të këtij ndalimi nga disa individë, kryesisht çiklistë që kanë hyrë në zonën e rrezikut për të shmangur devijimet përmes Tiefencastel. Ata janë raportuar në polici dhe pritet të gjobiten, transmeton albinfo.ch.

Fshati Brienz/Brinzauls ishte evakuuar për herë të parë në vitin 2023, kur një rrëshqitje masive e dheut ndaloi vetëm pak metra para shtëpive. Atëherë u llogarit që rreth 1.7 milion metra kub shkëmbinj ishin përfshirë në rrjedhën e dheut. Sipas vlerësimeve të fundit, në skenarët më ekstremë, kjo masë mund të jetë edhe më e madhe.

Autoritetet lokale i bëjnë thirrje qytetarëve dhe vizitorëve të respektojnë masat mbrojtëse dhe të mos hyjnë në zonën e ndaluar, për të shmangur rreziqe të panevojshme për jetën dhe për të mos penguar punën e shërbimeve emergjente dhe monitoruese, transmeton albinfo.ch.