Rreziqet kryesore globale, sipas ekspertëve: Inflacioni, moti ekstrem dhe luftërat

(AP Photo/Felipe Dana)

Stabiliteti global kërcënohet më së shumti nga rritja e kostove të ushqimit dhe energjisë, katastrofave të lidhura me klimën dhe rrezikut të konfliktit të mëtejshëm ushtarak, sipas 1200 ekspertëve të analizuar nga Forumi Ekonomik Botëror (WEF), përcjell albinfo.ch.

Raporti i Rreziqeve Globale të WEF 2023 pasqyron shqetësimet e liderëve politikë dhe të biznesit në mbarë botën.

Rritja e kostos së jetesës është etiketuar si shqetësimi më urgjent brenda dy vjetëve të ardhshme, e ndjekur nga fatkeqësitë natyrore dhe ‘konfrontimi gjeoekonomik’ – ose lufta.

Lista e rreziqeve afatshkurtra ka ndryshuar nga raporti i fundit, i publikuar në janar 2022, pas pushtimit të Ukrainës nga Rusia dhe ndikimit që kjo ka pasur në çmimet e energjisë dhe ushqimeve.

Në një horizont dhjetëvjeçar, kërcënimet mjedisore dominojnë katër pozicionet e para, të kryesuara nga “Dështimi për të zbutur ndryshimet klimatike”.

Ekspertët që kontribuan në raport janë gjithashtu të shqetësuar nga kërcënimi në rritje i krimit kibernetik si në afat të shkurtër ashtu edhe në atë afatgjatë, përcjell tutje albinfo.ch.

“Peizazhi i rrezikut afatshkurtër dominohet nga energjia, ushqimi, borxhi dhe fatkeqësitë”, tha drejtoresha menaxhuese e WEF, Saadia Zahidi, në Raportin e 18-të të Rreziqeve Globale. “Në këtë përzierje tashmë toksike të rreziqeve globale të njohura dhe në rritje, një ngjarje e re shokuese, nga një konflikt i ri ushtarak në një virus të ri, mund të bëhet i pamenaxhueshëm”.