Rritet përkrahja për iniciativën kundër migrimit masiv

Sikur javën e kaluar të organizohej votimi, vetëm 50 për qind të zviceranëve do të ishin kundër. 43 për qind të tyre do të votonin në favor të saj

Një kohë pas inicimit të iniciativës kundër migrimit masiv, të gjithë sondazhet parashihnin humbje të saj, gjegjësisht epërsi të theksuar të kundërshtarëve. Por, më pak se dy javë para votimit për këtë iniciativë, raporti i forcave la filluar të ndryshojë në favor të iniciuesve, respektivisht partisë SVP/UDC dhe të tjerëve.

Kështu, sikur javën e kaluar të organizohej votimi, vetëm 50 për qind të zviceranëve do të ishin kundër. 43 për qind të tyre do të votonin në favor të saj dhe 7 për qind ishin ende të pavendosur. Në krahasim me sondazhin e fundit të bërë në fillim ë janarit, përkrahësit e iniciativës janë shtuar për 6 për qind, shkruan srf.ch.

Me gjithë këtë rritje, vetëm brenda kampit të SVP/UDC-së përkrahësit janë në shumicë, gjegjësisht 89%. Nga ana tjetër, në SP/PS janë 87% kundër ndërsa te Partia e Gjelbër 75%, te CVP/PDC 64% dhe te FDP/PLR 63%.

Sipas medieve zvicerane një mobilizim i jashtëzakonshëm i SVP/UDC-së ka bërë që kjo iniciativë të shtojë përkrahësit.

Nga ana tjetër duhet thënë se të gjitha partitë e përfaqësuara në parlament së bashku me Këshillin Federal janë shprehur kundër iniciativës dhe kanë zhvilluar aktivitete për të sensibilizuar opinionin në këtë drejtim.