Rritje e rasteve të dhunës ndaj stafit të trenave në Zvicër

Keystone

Rreth 3,600 sulme ndaj stafit të hekurudhës ndodhin çdo vit në Zvicër, duke e kthyer këtë dukuri në një problem të vazhdueshëm për operatorin shtetëror të transportit hekurudhor, SBB. Edhe pse numri i incidenteve ka mbetur pothuajse i pandryshuar gjatë viteve të fundit, natyra e tyre është bërë dukshëm më brutale, transmeton albinfo.ch.

Sipas të përditshmes “SonntagsZeitung”, skenat e dhunës janë bërë të zakonshme në trenat zviceranë. Një rast i fundit tregon se si një pasagjer humbi kontrollin pasi iu refuzua bileta, dhe përpiqej ta detyronte asistenten e trenit të kthehej në vagon pas ndaljes në stacionin tjetër. Ndërhyrja e kolegëve dhe makinistit ishte e nevojshme për ta neutralizuar situatën.

Vetëm në muajin e kaluar, 20 pasagjerë janë dënuar për kërcënime, sulme fizike, fyerje apo ngacmim ndaj inspektorëve të biletave. Një rast ekstrem përfshinte edhe ekspozimin e organeve gjenitale përpara stafit të trenit.

Sipas statistikave të SBB-së, çdo ditë regjistrohen mesatarisht dhjetë raste të agresionit verbal apo fizik ndaj punonjësve të trenit, që përkthehet në rreth 3,600 raste në vit. Por hekurudha thekson se kjo është vetëm “maja e ajsbergut”, pasi shumë incidente nuk raportohen fare, shkruan 20minuten, transmeton albinfo.ch.

Zëdhënësi i SBB-së shprehu shqetësimin për këto zhvillime: “Agresioni ndaj punonjësve tanë dhe mes pasagjerëve është bërë dukshëm më i ashpër vitet e fundit. Këto janë zhvillime sociale shqetësuese për ne.”

SBB ka deklaruar se po shqyrton masa shtesë për të mbrojtur stafin dhe për të parandaluar rritjen e mëtejshme të dhunës në rrjetin hekurudhor, transmeton albinfo.ch.