Shakira ftohet të dalë para një gjykate në Spanjë

Këngëtarja kolumbiane, Shakira, është ftuar të paraqitet në një gjykatë të Spanjës më 12 qershor të këtij viti, për t’u përballur me akuzat kundër saj për mospagim të taksave në vlerë prej 14.5 milionë eurosh. Kështu thuhej në dokumentin e lëshuar nga gjykata të martën, më 26 shkurt.

Hetuesit ligjorë kanë lëshuar aktpadi kundër këngëtares në muajin dhjetor, duke e akuzuar atë për mospagim të taksave për të ardhurat e fituara brenda vitit 2012 dhe 2014, gjatë së cilës kohë, sipas tyre, Shakira ka jetuar në Kataluni.

Zëdhënësit e këngëtares kolumbiane nëpërmjet një deklarate për media, kanë bërë të ditur se Shakira nuk ka jetuar në Spanjë deri në vitin 2015 dhe se ajo gjithmonë i ka kryer të gjitha obligimet e saj tatimore.

Ylli i hiteve “Hips Don’t Lie” dhe “Clandestino”, rregullisht i ka ndjekur lojërat e futbollit të partnerit të saj, Gerard Pique, i cili luan për Barcelonën. Pique dhe Shakira, janë në lidhje që nga viti 2010, dhe i kanë dy fëmijë së bashku. Autoritetet spanjolle së fundmi i kanë vënë në shënjestër të famshmit, të cilët mundohen t’u ikin pagimit të taksave në shtetin e tyre.