Shkollat në Strugë, mungesë të lektyrave në gjuhën shqipe

Në vend që t’i siguroj shteti, shkollat në Strugë lektyrat më të reja në gjuhën shqipe i marrin në panairin e librit në Tiranë.

 Nëpër bibliotekat shkollore më shumë ka lektyra nga ish sistemi komunist, të cilat nuk janë në përdorim. Mungojnë lektyrat që parashihen sipas programit aktual mësimor. Në gjimnazin “Ibrahim Temo”, nxënësit dhe profesorët çdo vit tubojnë mjete dhe blejnë lektyra në Tiranë, shkruan alsatm, përcjell albinfo.ch.

Edhe profesorët ballafaqohen me të njëjtin problem. Ata thonë se numri i lektyrave është i vogël dhe nuk i përmbush nevojat e të gjithë nxënësve.

Nga 10.080 tituj të lektyrave në bibliotekën e gjimnazit në Strugë, vetëm 30% janë në gjuhën shqipe. Nga Ministria e Arsimit thonë se ky problem nuk është në kompetencën e tyre. 

Ata thonë se ministria as nuk shtyp e as nuk shpërndan lektyra. Nëse nxënësit nuk mund t’i gjejnë nëpër bibliotekat e shkollës, duhet të shkojnë nëpër bibliotekat publike. Ndërsa, nëse në shkollë mungojnë lektyra, atëherë duhet t’i gjejnë vetë.