Shkurorëzimet mes çifteve të huaja në Zvicër shënojnë rritje

Vitin e kaluar shkalla e shkurorëzimeve mes çifteve emigrante të martuar u rrit me një ritëm shumë më të lartë se sa mes shtetasve zviceranë dhe çifteve zviceranë-të huaj.

Në vitin 2018 u regjistruan 16.200 divorce në Zvicër, njoftoi të hënën Zyra zyrtare e shtetit (OFS) e vendit.

Kjo përfaqëson një rritje prej 2.1 për qind krahasuar me shifrat e vitit 2017, por shkalla më alarmuese është në mesin e çifteve të huaja në Zvicër, për të cilët numri i shkurorëzimeve u rrit me një shifër prej 23.4 për qind.

Ndërsa në çiftet zvicerane shkalla e shkurorëzimit është ulur me 6.1 për qind dhe mes çifteve zvicerane-të huaj gjithashtu u zvogëlua me 0.9 për qind.

Në përgjithësi, shkalla e divorcit në Zvicër aktualisht qëndron në rreth 40 për qind, me martesën mesatare që  zgjat 15 vjet.

Në nivelin aktual, OFS vlerëson se dy në çdo pesë martesa përfundojnë në divorc në një moment, përcjell albinfo.ch.

Në Zvicër u festuan 39.800 dasma në 2018-ën, një rënie prej 2 për qind krahasuar me statistikat e vitit 2017.

Sipas të dhënave zyrtare, ka pasur gjithashtu një rënie të ndjeshme të numrit të partneriteteve civile të regjistruara midis çifteve të të njëjtës gjini, me 13.2 për qind krahasuar me 2017.

Shkalla e lindjeve të Zvicrës ka rënë gjithashtu, nga 87,400 më 2017, në 85,300 më 2018, një rënie prej 2,4 për qind.

Vlen të përmendet se nga të gjithë të sapolindurit në Zvicër në vitin 2018, një e katërta kanë lindur për prindërit që ishin të pamartuar.

Shkalla e vdekjeve në Zvicër gjithashtu ka rënë pak më 2018, veçanërisht në mesin e meshkujve (-0.9 për qind) dhe femrave (-0.1 për qind).

Popullsia e përgjithshme e Zvicrës u rrit me 18,600 në vitin 2018, pavarësisht nivelit më të ulët të lindjeve të vendit.