Shqipëria dënon ashpër sulmin ndaj Izraelit

Presidenti i Republikës së Shqipërisë, Bajram Begaj, dënoi sulmin e fundit të Iranit ndaj Izraelit.

Në një deklaratë të postuar sot në “X”, Begaj rikonfirmoi qëndrimin e Shqipërisë kundër veprimeve që kërcënojnë paqen dhe sigurinë.

Kreu i shtetit Shqiptar bën të ditur se Shqipëria shpreson në shmangien e këtij konflikti, ndërsa thekson edhe pasojat në një shkallë më të gjerë që mund të shkaktojë përshkallëzimi i situatës në Lindjen e Mesme:

“Shqipëria dënon ashpër sulmin e paprecedent të Iranit ndaj Izraelit dhe përcjell shpresën se nuk do të ketë përshkallëzim të mëtejshëm. Çdo përshkallëzim i mëtejshëm mund të rrezikojë paqen dhe sigurinë në Lindjen e Mesme, si dhe të ketë pasoja të pakthyeshme në një shkallë më të gjerë”, shkruan presidenti i Shqipërisë.

Edhe kryeministri i Shqipërisë Edi Rama ka reaguar pas sulmit të Iranit ndaj Izraelit, mbrëmjen e së shtunës, duke theksuar se Shqipëria e dënon këtë sulm të ashpër dhe të paprecedentë, siç e quan ai.

Në një postim në X, kryeministri thotë se ky sulm përbën rrezik për të destabilizuar rajonin në mënyrë të pakthyeshme, duke shprehur solidaritetin me popullin izraelit.

“Shqipëria dënon ashpër sulmin e paprecedentë të nisur nga Irani kundër Izraelit, i cili përbën një kërcënim për të destabilizuar rajonin në mënyrë të pakthyeshme. Ne qëndrojmë në solidaritet me popullin izraelit dhe mbështesim plotësisht përpjekjet e partnerëve tanë drejt de-përshkallëzimit”, shkruan kryeministri shqiptar.

Më tej, Rama thekson nevojën kritike për armëpushim në Gaza, ” duke u siguruar që të gjithë pengjet të mund të kthehen të sigurt në shtëpi.”