Shqipëria, në frikë për sulme kibernetike nga Irani

Veç Iranit, Shqipëria mund të goditet nga sulme kibernetike nga Rusia. Paralajmërimin e dha në Komisionin për Ekonominë dhe Financat kreu i Autoritetit Kombëtar të Sigurisë Kibernetike dhe Certifikimit Elektronik, Igli Tafa.

“Nuk është sekret t’ju them se Irani ka kontraktuar grupet më të mëdha të hakerëve që ka dhe u ka kërkuar të gjejnë dhe të sulmojnë infrastrukturat më kritike që Shqipëria ka”, tha Tafa.

Kujtojmë që Shqipëria ka rënë pre e sulmeve kibernetike nga Irani, ku një sërë sistemesh në Shqipëri rreshtën së funksionuari. Rënia e “shtetit digjital” verën e vitit 2022 veç brishtësisë së infrastrukturës dhe neglizhencës së atyre që punojnë për të ruajtur të dhënat, nxori në pah edhe nevojën për ndryshime rrënjësore.

“Sulmet kibernetike do të vijojnë”, strategjia në letër nuk mjafton, duhet rrugë e gjatë deri te garantimi i sigurisë.

Duke reflektuar mbi atë që ndodhi, qeveria hartoi dhe miratoi Strategjinë e re të Sigurisë kibernetike.

Që nga ajo kohë, sulmet kibernetike nuk kanë të ndaluar, për rrjedhojë Autoriteti Kombëtar i Sigurisë Kibernetike dhe Certifikimit Elektronik kërkon angazhimin e të gjithëve për t’u mbrojtur nga Irani apo nga të tjerë hakerë.