Shtatë universitete zvicerane në Top 200

ETH Zurich është universiteti më i mirë, në vendin e 13-të, sipas rangimit që ka bërë për këtë vit magazina britanike “Times Higher Education”.

Shumë universitete zvicerane këtë vit pozicionohen mirë në një rangim ndërkombëtar të magazinës britanike “Times Higher Education”

Pas ETH-së në Cyrih, vjen ETH në Lausanne (EPFL) me numrin 34 (më herët 37), Universiteti i Bazelit është ngjitur një vend, nga 75 në 74, Universiteti i Cyrihut në vendin e 103-të, Gjeneva 107 dhe Berna në 132. Universiteti i Lozanës këtë vit renditet i 136-ti në renditjen e “Times Higher Education”, duke rrëshqitur në katër vende më poshtë.

Universiteti i Freiburgut ende mbetet në top 300.

“Zvicra ka një shans për të thyer monopolin britanik dhe atë amerikan që mbajnë 10 vendet e para”, tha Phil Baty, redaktor i magazinës.

“Çelësi i suksesit të Zvicrës ishin përpjekjet e universiteteve për të tërhequr talentet ndërkombëtarë. Izolimi në Evropë mund të jetë shumë i rrezikshëm”, tha Baty, duke aluduar në përjashtimin e universiteteve zvicerane nga programet kërkimore evropiane si pasojë e miratimit të iniciativës për ndalimin e migracionit.

Në vendet e para mbeten universitetet amerikane dhe britanike. Ashtu si vitin e kaluar, California Institute of Technology kryeson listën e universiteteve në botë. Universiteti i Harvardit është me numër dy. Më pas vijnë Universitetet e Oksfordit dhe Stanford.