Strasburgu: Dëmshpërblim familjarëve të viktimës nga azbesti

Sipas Strasburgut, afati i ankesës duhet të jetë më i gjatë pasi që sëmundjet e shkaktuara nga azbesti paraqiten një kohë të gjatë pas kontaktit me të

Gjykata Evropiane për të Drejtat e Njeriut në Strasburg i ka dhënë të drejtë familjarëve të mbetur të një punëtori të vdekur si pasojë e azbestit, në Zvicër. E veja e viktimës, kishte bërë ankesë në instancat e gjyqësisë zvicerane për vdekjen e të shoqit, nga pasojat e azbestit. Por ankesa e saj ishte hedhur poshtë me arsyetimin se bëhej fjalë për lëndë të vjetruar.

Personi kishte vdekur para 10 vitesh

Ndërkohë, Gjykata e Strasburgut ka ardhur në përfundimin se është e papranueshme mënyra se si Zvicra i qaset vjetrimit të rasteve të vdekjes nga azbesti. Sipas saj, viktimat nga kjo substancë kancerogjene duhet të kishin afat më të gjatë ankese dhe kërkimi të dëmshpërblimit se sa që praktikohet kjo në Zvicër.

Afati i vjetrimit të lëndës, sipas ligjeve në fuqi në Zvicër fillon atëherë kur personat e prekur kanë qenë për herë të fundit në kontakt me azbestin. Sipas Strasburgut, kjo është periudhë tepër e shkurtë, pasi që sëmundjet e shkaktuara nga azbesti, në të shumtën e rasteve paraqiten një kohë të gjatë pas kontaktit me të.

Gjykata ka detyruar Zvicrën që familjes së viktimës t`i paguajë një dëmshpërblim prej 12.810 eurosh si dhe shpenzimet procedurale prej 9000 eurosh.

Në Zvicër, nga pasojat e kontaktit me azbest kanë vdekur rreth 1300 persona. (sda)