Subvencionimi i rrymës, ministri Murati del me një njoftim të ri

Ministri i Financave, Hekuran Murati, ka bërë një njoftim me rëndësi sa i përket subvencionit të tarifave të energjisë elektrike për familjet e cenueshme.

Nëpërmjet një postimi në Facebook, ministri thotë se një numër i caktuar i aplikimeve që kanë pranuar, janë familje me vetëm 1 anëtar, që nënkupton se kryefamiljari që ka aplikuar ka harruar të shtojë anëtarët e tjerë të familjes, gjatë plotësimit të formularit.

Njoftimi i plotë:

Njoftim me rëndësi për të gjitha familjet që kanë aplikuar në programin e subvencionimit të tarifave të energjisë elektrike për familjet e cenueshme:
Një numër i caktuar i aplikimeve që kemi pranuar, janë familje me vetëm 1 anëtar, që nënkupton se kryefamiljari që ka aplikuar, ka harruar të shtojë anëtarët e tjerë të familjes, gjatë plotësimit të formularit.

Meqenëse lartësia e subvencionit përcaktohet edhe nga numri i anëtarëve të familjes, është e rëndësishme që në formularin e aplikimit të shtohen të gjithë anëtarët me të cilët banoni aktualisht.

Të gjithë ata që kanë harruar të shtojnë anëtarët e tjerë të familjes, e kanë mundësinë që ta përmirësojnë këtë duke përditësuar aplikimin e tyre në eKosova. Për t’u marrë parasysh në muajin vijues, përditësimi duhet të bëhet më së largu më 30 nëntor 2024.
Anëtarët mund të shtohen tek pjesa e paraqitur si në vijim, dhe pasi të keni përditësuar numrin e anëtarëve, e ridërgoni aplikimin tuaj duke klikuar “Apliko”.