Taksat e SHBA-së për Zvicrën, 25,000 lopë në rrezik therjeje

Tarifat doganore të Trumpit frenojnë shitjet e djathit zviceran në Amerikë, ndërsa tepricat e qumështit rriten - Fondi i emergjencës është ndarë për të mbështetur eksportet

Në Zvicër, 25,000 lopë janë në rrezik të theren për shkak të detyrimeve doganore të SHBA-së, raporton NZZ am Sonntag, bazuar në të dhënat nga Shoqata Ndërprofesionale e Sektorit të Qumështit (IP). Sipas kësaj të fundit, teprica e qumështit për shkak të rënies së ndjeshme të shitjeve të djathit në Shtetet e Bashkuara pas rritjes së detyrimeve doganore arrin në 5%.

Duke marrë parasysh se kushtet e favorshme të motit kanë çuar në një prodhim qumështi mbi mesataren, shoqata beson se është e nevojshme të zvogëlohet numri i lopëve për të shmangur një rënie të çmimeve. Në Zvicër ka rreth gjysmë milioni lopë qumështi dhe mesatarisht 85,000 theren çdo vit.

Rritja e furnizimit, e kombinuar me kërkesën më të ulët, po shkakton automatikisht uljen e çmimeve. Prandaj, IP bën thirrje për një ulje të numrit të lopëve për të mbajtur çmimin e qumështit në një nivel të pranueshëm.

Vitet e fundit, fermerët morën një pagë prej rreth 70 centësh për litër qumësht. Por këtë vit, disa prej tyre janë të detyruar të shesin një pjesë të qumështit të tyre për 30 cent më pak. Sipas IP-së, disa fermerë kanë filluar tashmë të zvogëlojnë kopetë e tyre dhe të dërgojnë kafshë të shëndetshme në thertore, shkruan RSI, transmeton albinfo.ch.

Për të zvogëluar thertoren, e cila përfaqëson gjithashtu një humbje të të ardhurave për fermerët, Shoqata Ndërprofesionale e Qumështit do të përdorë një fond emergjence për të mbështetur eksportet në nëntë muajt e ardhshëm. IP-ja do të ndajë 11 milionë franga për përpunuesit – dhe për këtë arsye, në mënyrë indirekte, për prodhuesit – për të siguruar që kremi dhe gjalpi të mund të shiten me çmime konkurruese në tregun ndërkombëtar.

---