Vdiq fotoreporteri Alban Bujari, dokumentuesi i luftës dhe i paqes

Mësohet se fotoreporteri i mirënjohur, Alban Bujari ka vdekur. Bujari ishte një ndër fotoreporterët më të shquar të Kosovës dhe ndër të parët që ka dokumentuar periudhën e luftës në Kosovë gjatë viteve 1997-99.

Alban Bujari ishte pjesë e ekipit të KOHËS që kur nisi karrierën e tij në të përditshmen “Koha Ditore” në vitin 1997.

Ai ishte pjesë e grupit të fotoreporterëve kosovarë që kanë përcjellë zhvillimet politike dhe sociale të fundviteve të ‘90-ta. Në veçanti luftën mes UÇK-së dhe forcave serbe dhe krizën humanitare të refugjatëve shqiptarë të Kosovës.

Gjatë kësaj periudhe, puna e Bujarit u botua në mediat më prestigjoze ndërkombëtare, si “Time”, “Sunday Time”, “The Independent”, “The Guardian”, “El Pais”, “Fokus”, “Suddeutche”, “Zeitung”, “Kyoto News”, e plot të tjera.

Ndër fotografitë më të dalluara janë ato që dokumentojnë masakrimin e familjes Jashari në Prekaz më 1998, masakrën e Reçakut më 1999 dhe masakrën e shqiptarëve në Rogovë më 1999. Përveç këtyre, ato pasqyrojnë edhe transformimin e UÇK-së në TMK dhe më pas në FSK-në profesionale, me synim anëtarësimin në NATO.

Alban Bujari gjithashtu ka punuar edhe për agjencinë evropiane të shtypit EPA, përgjegjës për mbulimin e luftës në Kosovë gjatë viteve 1998-99.

Varrimi do të mbahet sot, 28 shkurt, në varrezat e Prishtinës në Dragodan, nga ora 14:45.