Vit i hidhur për çokollatën zvicerane

Megjithatë, zviceranët edhe vitin e kaluar kanë ngrënë mesatarisht po aq çokollatë sa dhe një vit më parë, 11.9 kilogramë

Industria zvicerane e çokollatës ka lënë prapa vetes një vit “të “hidhur”. Si nga sasia e prodhimit ashtu dhe nga fitimi, viti 2012 shënon një rënie në krahasim me një vit më parë. Shitja ka qenë për 2.2 për qind më e ulët ndërsa qarkullimi 3.4 % ose 1.63 miliard franga më i vogël se në vitin 2011.

Shkak për rënien e konsiderueshme që kanë shënuar 18 prodhuesit zviceranë të çokollatës ka qenë rënia e shitjes së saj jashtë endit, për shkak të ngritjes së vlerës së frangut në raport me valutat tjera. Ky zhvillim e ka bërë produktin e vlerësuar lartë të Zvicrës më të shtrenjtë për blerësit jashtë vendit.

Ngritja e vlerës së frangut ka bërë po ashtu që edhe në Zvicër të blihet më lirë çokollata nga vendet e jashtme gjë që ka ndikuar po ashtu.

Siç njofton federata e prodhuesve të çokollatës Schocosuisse, zviceranët edhe vitin e kaluar kanë ngrënë mesatarisht po aq çokollatë sa dhe një vit më parë, 11.9 kilogramë.