Vritet një polic në Kosovë para banesës së tij

U gjet i plagosur rëndë në hyrje të ndërtesës, krejt çka dihet deri më tani për vrasjen e policit në Kaçanik

Një polic është vrarë mbrëmë në Kaçanik. Ai u gjet i plagosur rëndë në hyrje të ndërtesës së tij.

Polici M. L. më pas u transportua në Qendrën e Mjekësisë në Kaçanik, por nuk arriti t’i mbijetonte plagëve, përcjell albinfo.ch.

Zëdhënësi i Policisë për rajonin e Ferizajt, Kanun Veseli, tha se rasti ka ndodhur rreth orës 23:00.

Rrethanat tjera të vdekjes janë ende të paqarta.

“Më 01.04.2025, rreth orës 23:00, kemi pranuar një informacion se një person është plagosur dhe gjendet në gjendje të rëndë në hyrje të ndërtesës së tij, në rrugën ‘Idriz Seferi’ në Kaçanik. Viktima është një pjesëtar i Policisë së Kosovës. Në vendngjarje, përveç njësive policore, ka dalë edhe ekipi i emergjencës së Kaçanikut, të cilët e kanë transportuar në Qendrën e Mjekësisë në Kaçanik. Si pasojë e plagëve të marra, pjesëtari i Policisë ka ndërruar jetë, gjë që është konstatuar nga mjekët në këtë qendër,” ka deklaruar Veseli.

Ai tha se për të gjitha veprimet policore është njoftuar prokurori i shtetit dhe IPK-ja.

“Hetuesit dhe krimteknikët rajonalë kanë dalë në vendin e ngjarjes për të kryer ekzaminimet e nevojshme. Nuk dihen ende shkaqet se si ka ardhur deri te kjo ngjarje. Për informacione të tjera do të njoftoheni me kohë,” ka deklaruar Veseli.

---