Zvicër: Parlamenti voton që etërit të kenë dy javë “Pushim të lindjes”

Zgjidhja e propozuar nga parlamenti mund të vihet në jetë nëse iniciativa hidhet poshtë nga populli dhe numri më i madh i kantoneve ose në rast se komiteti bartës i iniciativës tërhiqet

Etërit në Zvicër në të ardhmen do të kenë dy javë pushim me pagesë pas lindjes së fëmijës së tyre. Pas Dhomës së Kantoneve edhe Dhoma Nacionale e Parlamentit të Zvicrës e ka miratuar me shumicë votash këtë propozim të bërë nga qeveria e vendit, shkruan srf.ch.

Pas një debati të stërzgjatur në të cilin morën pjesë 58 deputetë deh deputete, “Dhoma e Madhe”, siç quhet ndryshe Dhoma Nacionale, miratimi u bë me 129 vota pro, 62 kundër dhe një të përmbajtur, transmeton albinfo.ch.

Ajo për të cilën votuan shumica e deputetëve është kundërpropozimi indirekt i qeverisë i bërë ndaj iniciativës popullore të emërtuar: “Për një pushim të arsyeshëm atëror – në të mirë të gjithë familjes”.

Bartësit e iniciativës në fjalë kërkonin katër javë pushim për baballarët e rinj ndërsa mbetet e hapur nëse ata do të tërhiqen nga hedhja në votim popullor e iniciativës së tyre pas miratimit të kundërpropozimit në fjalë.

Ndërkaq, zgjidhja e propozuar nga parlamenti mund të vihet në jetë nëse iniciativa hidhet poshtë nga populli dhe numri më i madh i kantoneve ose në rast se komiteti bartës i iniciativës tërhiqet.

---