Zviceranët jashtë vendit, të shqetësuar me pasojat e “Iniciativës…”

“Ndonëse shumë nga ne kjo situatë nuk i prek, ajo i prek të rinjtë tanë”, ka thënë anëtarja e kryesisë së këshillit ASR, Elisabeth Michel

Këshilli i Zviceranëve Jashtë Vendit (ASR), në kuvendin e tij delegues të mbajtur të shtunën në Bernë ka shprehur shqetësimin për keqësimin e pozicionit të shtetasve zviceranë që jetojnë jashtë Zvicrës pas miratimit të iniciativës kundër migrimit masiv.

Shqetësimi ka të bëjë me zviceranët që jetojnë në shtetet e Bashkimit Evropian, ndaj të cilave edhe drejtohej iniciativa.  

“Ndonëse shumë nga ne kjo situatë nuk i prek, ajo i prek të rinjtë tanë”, ka thënë në kuvend anëtarja e kryesisë së këtij këshilli, Elisabeth Michel.

ASR konfirmon se në vendet e BE-së jetojnë rreth 450 mijë shtetas zviceranë, të cilët ndodhen para një të ardhmeje të pasigurt.

Udhëheqësi i Drejtorisë për çështje evropiane në këtë këshill, Henri Gétaz ka theksuar se megjithatë ende vlen rregulli sipas të cilit të drejtat tashmë të realizuara duhet të vazhdojnë të vlejnë edhe në të ardhmen.

Sipas tij, ndryshimet eventuale nuk mund të ndodhin në tri vitet që vijnë.

Në këtë kuvend janë shprehur shqetësime sidomos lidhur me pozicionin e studentëve zviceranë pas “Iniciativës…”, gjegjësisht pas pezullimit që BE i ka bërë pjesëmarrjes së Zvicrës në programet e këmbimit të studentëve Erasmo dhe në programin shkencor “Horizon2020”.

Këshilli i Zviceranëve Jashtë Vendit është një organizatë e themeluar në vitin 1916 dhe i përfaqëson në Zvicër interesat e mërgatës zvicerane.