Zviceranët, më pak të rrezikuar se kurrë

Rënie veçanërisht të madhe kanë shënuar frika nga varfëria si pasojë e inflacionit dhe nga mbingarkesa me borxhe

Popullsia e Zvicrës asnjëherë në 25 vitet e fundit nuk është ndjerë më pak e rrezikuar se tash. Një “barometër i frikës” i realizuar nga instituti për hulumtimin e opinionit publik gfs.zürich ka ardhur në këtë përfundim, duke i analizuar 31 indikatorë të ndryshëm. Në 28 nga këta indikatorë zviceranët e anketuar kanë treguar ngritje të ndjenjës së sigurisë subjektive. Rënie veçanërisht të madhe kanë shënuar frika nga varfëria si pasojë e inflacionit dhe nga mbingarkesa me borxhe.

Ndërkaq, sipas këtij studimi zviceranët aktualisht frikësohen më së shumti nga ndotja e ambientit dhe nga ndryshimi i klimës. Në vendin e tretë është frika nga pasojat negative të migracionit. Paralelisht me këtë, zviceranet frikësohen edhe nga sëmundjet.

Por në përgjithësi, frika e të gjitha llojeve ka shënuar rënie në krahasim me vitin e kaluar. Më së shumti rënie ka shënuar shkalla e frikës nga zhvillimet socioekonomike.

Për të realizuar këtë studim janë anketuar njëmijë banorë të të dyja gjinive, nga Zvicra gjermane dhe nga ajo frankofone.