Zvicra kundërshton kritikat e OKB-së lidhur me torturën

Në Zvicër ndiqen të gjitha deliktet që figurojnë në konventën e OKB-së kundër torturës, edhe kur ato nuk janë të definuara në Kodin Penal

Zvicra kundërshton vërejtjet  të cilat i ka shprehur ndaj sistemit juridik zviceran komisioni i OKB-së për tortura. Autoritetet zvicerane konsiderojnë se shteti ka bërë përpjekje të mjaftueshme në luftë kundër torturës.

Komisioni në fjalë kishte deklaruar se mangësi e Zvicrës në këtë drejtim është fakti se në Kodin Penal të saj nuk ekziston përshkrimi i torturës si vepër penale.

Ndërsa një delegacion i Zvicrës i pranishëm me rastin e bërjes së këtyre deklaratave ka argumentuar se në Zvicër ndiqen të gjitha deliktet që figurojnë në konventën e OKB-së kundër torturës, edhe kur ato nuk janë të definuara në Kodin Penal.

Komisioni i OKB-së kishte gjetur mangësi edhe në mbipopullimin e burgjeve, mungesën e mbështetjes për të burgosurit e mitur etj.

Nga ana tjetër, konsensus në mes të dy palëve por edhe OJQ-ve, ka pasur lidhur me nevojën për aplikimin e burgut administrativ para dëbimit (të të huajve). Ndërtimi i planifikuar i dy burgjeve të reja është hapi i duhur në këtë drejtim, shkruan sfr.ch.

Kritikave mbi kushtet e mbajtjes në burg, përfaqësuesit zviceranë u janë përgjigjur se trajtimi i barabartë mjekësor në Zvicër është i garantuar, transmeton albinfo.ch. Por, kanë pranuar ata, praktika shpesh dallon nga njëri kanton në tjetrin.