Zvicra zbaton paketën e re të sanksioneve të BE-së kundër Rusisë

(KEYSTONE/Ti-Press/Elia Bianchi)

Këshilli Federal njoftoi të martën se miratoi masat e fundit të prezantuara më 16 dhjetor nga Bashkimi Evropian, në bazë të paketës së nëntë të sanksioneve, përcjell albinfo.ch.

Këto sanksione përfshijnë ndalimin e shërbimeve në fushat e testimit të produkteve, reklamave, hulumtimit të tregut, si dhe kontrolle dhe kufizime të reja në eksportin e mallrave të ndryshme, duke përfshirë ato “që kontribuojnë në rritjen e kapaciteteve industriale ruse”, tha Këshilli Federal.

“Përveç kësaj, ndalimi i eksportit të mallrave për industrinë e hapësirës ajrore do të zgjerohet për të përfshirë motorët për avionë dhe dronë. Po kështu, investimet e reja në sektorin e minierave ruse do të ndalohen”.