2 për qind më pak pensione invaliditeti në Zvicër

Gjatë vitit 2014 në Zvicër janë ndarë 14.200 pensione të reja. Ky numër, nga viti rekord 2003 kur ishte 28200 ka rënë për 50% dhjetë vite më vonë

Numri i njerëzve që marrin pensione të invaliditetit (IV) po vjen duke rënë. Gjatë vitit 2014, siç njofton Zyra Federale për Sigurime Sociale (BSV), ky numër është zvogëluar për 2 për qind duke rënë në 225.70.

Analiza e bërë nga kjo zyrë tregon po ashtu se nuk është shënuar ndonjë kalim i theksuar i njerëzve nga sigurimi invalidor në sektorin e ndihmave sociale. Gjatë vitit 2014 IV ka marrë më tepër masa për riintegrimin profesional të pensionistëve invalidorë.

Veç kësaj, gjatë vitit 2014 janë dokumentuar 540 raste të abuzimit me sigurimin pensional invalidor. Me këto zbulime, është penguar pagesa e mëtejme e 390 pensioneve të plota të pamerituara që përbën një kursim prej 144 milionë frangash.

Sipas BSV-së, gjatë vitit 2014 në Zvicër janë ndarë 14.200 pensione të reja. Ky numër, nga viti rekord 2003 kur ishte 28200 ka rënë për 50% dhjetë vite më vonë. Nga viti 2012 ai është stabilizuar në 14.000 pensione të reja.