287.100 të huaj nga zonat kufitare punojnë në Zvicër

Në vitin 2009 punonin 221.600 veta ndërsa në fund të vitit 2014 ishin 287 mijë

Gjatë vitit të kaluar në Zvicër kanë punuar 287.100 të huaj të cilët kanë jetuar në vendin e tyre, në zonat kufitare me Zvicrën. Kjo tregon se numri i tyre është rritur për 3.1 për qind ose 8600 më shumë se një vit më parë. Me gjithë këtë, kjo është shkalla më e ulët e rritjes së kësaj kategorie gjatë pesë viteve të fundit, njofton Zyra Federale për Statistikë. Kështu në vitin 2013 kishte rritje prej 3.8%, në vitin 2012, 6.0% dhe në vitin 2011, 9.1%.

Në vitin 2009 punonin 221.600 veta që në krahasim me numrin e shënuar në fund të vitit 2014 (kur ishin 287 mijë) është një rritje prej rreth 66.000.

Numri më i madh i punëtorëve “kufitarë” që punojnë në Zvicër vijnë nga Franca, gjegjësisht kanë vendbanimin në Francë.

Pothuaj 62 për qind të punëtorëve nga ana tjetër e kufirit punojnë në sektorin e shërbimeve, 37.4% në industri dhe 0.7% në bujqësi.