80 orë në ajër, rekord botëror i fluturakes zvicerane pa pilot

Një grup studiuesish të Universitetit Teknik të Cyrihut (ETH) ka realizuar një rekord botëror me aeroplanin pa pilot që lëviz me energji diellore “AtlantikSolar”. Kjo fluturake që peshon vetëm 7 kilogramë ka arritur të qëndrojë më shumë se 80 orë në ajër. “AtlantikSolar” pas kësaj aventure ka aterruar në mbrëmjen e të premtes pa komplikime në Rafz të Cyrihut. Me këtë kohëzgjatje të fluturimit ai ka thyer rekordin e deritashëm duke realizuar plot 33 orë më shumë qëndrim në ajër, ka thënë pe mediet zvicerane udhëheqësi i projektit Philipp Oetershagen.

Aeroplani ka një gjerësi krahësh prej 5.6 metrash ndërsa shpejtësia që arrin gjatë fluturimit është në mes 35 dhe 40 kilometra në orë. Ai udhëhiqet nga një sistem autonom kontrolli, të zhvilluar në ETH Cyrih. Fluturakha është konceptuar për aksione të mëdha kërkimi dhe shpëtimi në zonat e krizës dhe është pjesë e projektit hulumtues të BE-së “Icarus”.

Studiuesit e ETH planifikojnë që me “AtlantikSolar” në verën e vitit 2016 të realizojnë një fluturim pesëditësh në relacionin prej 4500 kilometrash mbi Atlantik nga Bostoni (SHBA) deri në Lisbonë (Portugali).