Protestë për paga të barabarta ndërmjet grave dhe burrave

Në mesin e protestuesve kishte edhe aktivistë shqiptarë

Në Bernë të shtunën kanë demonstruar për një zbatim të shpejtë dhe të barabartë të pagave në Zvicër më shumë se 12.000 gra dhe burra. Një tubim të tillë e kishin ftuar një koalicion i gjerë i 48 organizatave të grave nga e majta dhe e djathta.

Demonstruesit u mblodhën në qendër të Bernës, duke përsëritur kërkesat e tyre për barazi ndërmjet grave dhe burrave: “Liberte – égalité – Solidarité”. Duke u bazuar në aleancën e 48 organizatave të grave, në miting kanë folur me dhjetëra gra. Në mesin e protestuesve janë parë edhe aktivistë shqiptarë.

Këshilli Federal vendosi tetorin e kaluar në përpjekje për të proceduar ligjërisht kundër diskriminimit të pagave ndaj grave. Parimi i pagesës së barabartë për burrat dhe gratë është i paraparë edhe me Kushtetutën Federale që nga viti 1981.

Megjithatë, gratë në Zvicër fitojnë rreth 19 për qind më pak se burrat. Pothuajse gjysma e kësaj diference nuk mund të shpjegohet me anë të faktorëve objektivë dhe për këtë arsye bëhet fjalë për një diskriminim të paligjshëm të pagave në bazë të gjinisë.