Zvicra ul për 90 milionë ndihmat e jashtme për zhvillim

Për vitin 2015 parashihet një deficit struktural prej 1.2 miliard frangash ndërsa në vitin 2016 ky defiocit pritet të ngjitet në 1.4 miliard

Pasi që parashihet një deficit i buxhetit të shtetit, qeveria planifikon që për periudhën 2016-2019 të zvogëlojë ndihmat e jashtme për zhvillim. Ky kursim i shpërndarë në katër vite do të jetë 90 milionë franga, është pohuar të shtunën nga Departamenti Federal  i Financave (EFD), shkruan gazeta NLZ.

Shkaktar i këtij reduktimi është deficiti i pritshëm. Për vitin 2015 parashihet një deficit struktural prej 1.2 mliard frangash ndërsa në vitin 2016 ky defiocit pritet të ngjitet në 1.4 miliard. Që të mund të bëhet frenimi i borxheve, deficiti duhet të “pastrohet”. Dhe, një pjesë e konceptit të pastrimit e prek, sipas EFD-së bashkëpunimin ndërkombëtar zhvillimor gjegjësisht ndihmat që Zvicra u jep vendeve të botës për nxitjen e zhvillimit të tyre.

Por, ulja për 90 milionë e këtyre ndihmave nuk do ta zbresë kuotën zvicerane të ndihmës për zhvillim. Ajo do të mbetet edhe më tutje 0.5 për qind e të ardhurave nacionale bruto.

Arsyeja për këtë zhvillim qëndron në faktin se shtimi i kërkesave për azil ka imponuar rritjen e shumës së mjeteve për këtë destinim dhe ato mjete i janë shkëputur fondit të planifikuar për ndihmën për zhvillim.

Sekretariati Shtetëror për Migracion (SEM) llogarit në një numër prej 30 mijë kërkesash për azil, dhe për të financuar këtë rritje numri, janë nevojitur 150 milionë franga.