Dorëhiqet diplomatja zvicerane, e dërguar e OSBE-së në Ukrainë

E dërguara e posaçme e OSBE-së për Ukrainë, ambasadorja zvicerane Heidi Tagliavini ka vendosur të dorëzojë mandatin e saj, gjegjësisht të tërhiqet nga posti. Diplomatja me përvojë, nuk ka dhënë arsyet për tërheqjen.

Ministria e Punëve të Jashtme e Zvicrës (EDA) ka konfirmuar lajmin e publikuar së pari nga emisioni “Tagesschau” i televizionit publik të Zvicrës. EDA vetëm ka ritheksuar se Tagliavini ka shprehur dëshirën për ta braktisur punën e saj të deritashme, pa dhënë njoftime për motivin dhe as për kohën e saktë kur ajo do ta bëjë këtë.

Ish presidenti i Federatës, njëherësh ministri i jashtëm i Zvicrës,. Didier Burkhalter, i cili vitin e kaluar e drejtonte OSBE-në, e kishte emëruar Tagliavinin para rreth një viti në postin e të dërguarës së posaçme për Ukrainë. Në janar, asaj ia ka vazhduar mandatin edhe pasardhësi i Burkhalterit në krye të OSBE-së, nministri i jashtëm serb, Ivica Dacic, shkruan srf.ch.

Heidi Tagliavini është e lindur në Bazel në vitin 1950 ndërsa nga viti 1982 ka punuar në shërbimin diplomatik.