Gjykohet zjarrfikësi për 15 zjarrvënie të qëllimshme

Në periudhën në mes viteve 2012 dhe 2014 në këtë regjion ka pasur së paku 20 shpërthime zjarri, për 15 nga të cilat fajësohet një zjarrfikës

Ndodh edhe kjo: Sot në Gjykatën e Qarkut në Moutier të kantonit të Bernës ka filluar procesi gjyqësor kundër një zjarrfikësi i cili dyshohet për një numër zjarrvëniesh të qëllimshme. Tashmë ish zjarrfikësi 26 vjeç akuzohet se ka vënë një seri zjarresh në Reconvilier me rrethinë, të kantonit të Bernës.

Në periudhën në mes viteve 2012 dhe 2014 ka pasur së paku 20 shpërthime zjarri në regjionin e përmendur. Janë djegur kryesisht ndërtesa të zbrazëta, të pabanuara kështu që në asnjë rast nuk ka pasur të lënduar.

Policia i ka rënë në gjurmë zjarrfikësit piroman ë mars të vitit 2014. Ai qe arrestuar pasi që po kthehej nga një aksion për fikje të zjarrit në një kasolle skitarësh në Tavannes.

Gjatë marrjes në pyetje i akuzuari ka pranuar se ai e ka vënë zjarrin në kasollen e përmendur dhe në shumë raste të tjera që kanë ndodhur në regjion.    

Përfundimisht, zjarrfikësi vullnetar duhet të përgjigjet për 15 raste të vënies së zjarrit dhe për një tentim zjarrvënjeje.

Vendimi pritet të sillet këtë të enjte.