Humb jetën zvicerani, në rrugë drejt rekordit botëror në fluturim

Aventurieri zviceran i kishte vënë synim vetes që të kalojë nëpër 34 vende të botës. Ai planifikonte që në këtë mënyrë të fluturonte 76.000 kilometra

Ishte duke e përmbushur ëndrrën e tij jetësore, që për njëzet muaj të sillej rreth botës me fluturaken e tij ultra të lehtë. Por, zviceranin Eric Guilloud e ka penguar vdekja për ta realizuar këtë synim. Ai ka humbur jetën të shtunën, pasi që me fluturaken e tij është përplasur në kodrën vullkanike, të vargmaleve të Andeve, në shtetin latinoamerikan, Ekuador, pas startimit nga qyteti Latacunga afër Quito-s.

Ende nuk dihen rrethanat e vdekjes. Siç bën të ditur Zyra për Aviacion Ajror e këtij vendi, specialistët janë në rrugë për vendin e fatkeqësisë për të marrë kufomën.

Aventurieri zviceran i kishte vënë synim vetes që të kalojë nëpër 34 vende të botës. Ai planifikonte që në këtë mënyrë të fluturonte 76.000 kilometra të cilat donte t`i kalonte për 384 orë, duke aterruar 106 herë.

Pas Ekuatorit, fluturimi do të vazhdonte nëpër Peru, Bolivi, Kil, Argjentinë dhe Brazil.