KF Hajvalia po stërvitet për ndeshjen ndaj Sionit në Zvicër

Ndeshja miqësore e KF Hajvalisë kundër skuadrës zvicerane Sion do të zhvillohet më 27 qershor në Zvicër.

Futbollistët e KF Hajvalisë kanë nisur të përgatiten për ndeshjen miqësore që do ta zhvillojnë kundër ekipit nga Zvicra, Sion.

Skuadra e trajnerit Emin Bajrami që nga dita e mërkurë i ka nisur stërvitjet, ndërsa futbollisti i këtij klubi, Azem Ahmeti, tha se një pjesë të stërvitjeve do t’i zhvillojmë në Prishtinë, ndërsa pjesën tjetër do ta vazhdojmë në Zvicër.

„Do të mundohemi që në këtë ndeshje të paraqitemi sa më mirë”, ka thënë për KosovaLive Azemi.

Rezultati i arritur në këtë ndeshje nuk ka rëndësi të madhe.

“Do të mundohemi të tregojmë një lojë të mirë, për këtë arsye rezultati qëndron në plan të dytë. Mendoj që duhet t’iu jepet rast futbollistëve të rinj në këtë ndeshje. Ata duhet të dëshmojnë se futbolli dhe futbollistët kosovarë vlejnë”, ka thënë mesfushori Ahmeti.